سۆران ئەحمەد

ئەو كاتەی ئەخلاق، بەهایەكی نامێنێ!

8/12/2017 5:53:00 PM

ئارەزووم لە فەنتازیاو قسەی زلی ناو كتێبەكان نییە، چونكە روون بۆتەوە كە میللەتێكی چەندە كۆڵەوارین، نە كتێب‌و نە خوێندنەوەو نە خوێندەواریش لای ئێمە ئەرزشێكی نییە لەزۆر بابەت و پرسی هەستیاردا، كە پێویستی بە بڕیاری لۆژیك و عەقلانی هەیە، ئەوەی ئێمە هەمانە، هەر جنێوە هەر هێرش و بەدگۆیی‌و گفت‌و رەفتاری نا مۆراڵی‌و ئەخلاقییە.

هەندێك سایت و تیڤی ‌و پەیجەكانی سۆشیال مییدیاش، بە داڕشتنی سەرپێی، بە زانیاری هەڵە و هەڵبەستراو، بەڕیزكردنی وشەسازی راگوزەر و هەژار، ئەم دیاردەیە برەو پێدەدەن‌ و بازاڕیان بۆ گەرم كردووە بەبێ‌ ئەوەی لەدەرهاویشتە ترسناكەكانی ئەم سیاسەتە و لێكەوتەكانی بگەن، كە بوونەتە سەرچاوەیەكی گەورە بۆ بەرهەمهێنانی گوتاری هەڵچوون و رق دروستكردن و تێكدانی ئاشتی كۆمەڵایەتی.

ئەم جۆرە میدیایانە كە بێ‌ هیچ مۆراڵ ‌و ئاكارێكی مرۆیی، ئەم كەڵچەرە ترسناكە، بەروحیەتێكی ئاژاوەگێڕی و شەڕانگێزانە، رەواج پێدەدەن. ئەلف‌ و بایەكیان بەسە بۆ ئەوەی دەستبەجێ، بە كۆمەڵێك تۆمەت و سوكایەتی و تەشهیری بازاڕییانە، بەجنێونامەی حازر بەدەست پەلامارت بدەن.

ئەم میدیایانە راناهێناوین، لەپشتەوە، لە ژێرەوە كارمان بەتەنها نابوتكردن‌و ریسواكردنی ئەوی تر بێ، یەك سیما و چەندین كاراكتەرمان هەبێ‌، دەیان ناوی وەهمی و خوازراو، لەسەرەوە هەڤاڵ بین و لەژێرەوە نەیار بەداخەوە، وەك ئەوەی ئێستا لەناو هێزو لایەنە سیاسیەكانی كوردستاندا دەبینرێت، لەناو یەكێتیشدا هەروەها.. كە بۆتە مەرگی پرەنسیپ و بەها سیاسی‌و كۆمەڵایەتیەكان.

ئەگەر بۆ كورد ئەمە بەدبەختی بێ‌، بۆ یەكێتی شەرم ‌و عەیبەشە، چونكە دەبینی خەریكە یەكێتیی وردە وردە دەست‌و پەنجە لەگەڵ ئەم نەریت‌و دیاردە شەرمهێنەدا نەرم دەكات، كە رق و قینمان زیاد دەكات ‌و ناكۆكییە كۆمەڵایەتی و سیاسییە كۆن و بەسەرچووەكانیش زیندوو دەكاتەوە، چونكە كۆی ئەو رەخنە و جنێو و هەڕەشانەی بەناوی خوازراوەوە، لەو پەیج ‌و سایتانەوە لە یەكێتی ‌و كاراكترە سیاسییەكانی دەكرێن، بەشی هەرە زۆری شەڕی رق ‌و كۆنە قینە.

هەفتەی رابردوو، هەفتەی هێرشی رق ‌و نا ئەخلاقی بوو بۆ سەر هەندێك لەسەركردەكانی یەكێتیی، لەناویاندا (هێرۆ خان) ‌و (مەلا بەختیار) كە بەڕاستی شەرمهێن بوو، تا ئەو پەڕی بەد ڕەوشتی بەتایبەت كە ئەو رقە و قینە دژی مەلا بەختیار،  بەخۆیەوە نەوەستا، ژن و كوڕ و كچەكانیشی گرتەوە.

تەنها دەمەوێ‌ بڵێم (ی.ن.ك)  گەر نەتوانێت یەكێك لەهەرە دێرنترین سەركردەكانی خۆی، كە ئێستا سەركردایەتی حزبەكەی دەكات، لەو ئیرهابە فكریی‌و ئەخلاقییە بپارێزێت..! ئەی چۆن  دەتوانێت بابایەكی وەك ئێمەو مانان (مەبەست: ئێمەی هاووڵاتیان) بپارێزێت.

ئەگەر بەشێك، ژمارەیەك لەكەسەكانی ناو یەكێتی لە سەركردایەتی تا بە ژمارەیەك لە كادرەكان دەگات، خۆیان بەشدارنەبن لەو هێرشە نامۆراڵییە ئەخلاقییە، خەڵكی تر لەو مییدیایانە چۆن دەتوانن بەو شێوەیە فراوان ‌و بەر بڵاوییەوە ئەو هێرشانە بكەن؟

سەیرە، هەر زۆر گاڵتەجاڕیشە، سەركردە هەبێ‌ پارە بدات بۆ ئەوەی دوو نەخۆشی نەخوێندەوار لە پشت كۆمپیوتەر و مۆبایلەكانیانەوە، هێرشی بۆ بكەنە سەر سەركردە و هەڤاڵێكی خۆی، كە دەشێ‌ لەكۆبوونەوەی ئاییندەی سەركردایەتی لەتەنیشتییەوە، دابنیشێت..! چونكە هەر سەركردەیەك لە یەكێتی باوەڕی بەوە هەبێ‌، بەبێ‌ یەكێتی پێگەو سەنگێكی هەیە ئەوە بەهەڵەدا چووە، چونكە هەر سەركردەیەك ئەوەی هەیەتی، بەشی هەرە زۆری هی یەكێتییەو كەمترینی هی خۆیەتی، یەكێتیش بەهەموو سەركردەكانییەوە بووە بەو یەكێتییەی ئێستا رۆڵی میحوەری خۆی دەگێرێت.

ئاخر دەپرسم ئەو ئەربابانە، بە من و جەماوەری یەكێتیش ناڵێن: چۆن لە رویان دێت سەیری یەكتر بكەن..! ئەدیئەی  كە ئەم كارە دژی هەڤاڵێكی خۆت دەكەیت، دەبێ‌ قبوڵیشت بێ‌، كە من جەنابتان لە تیڤی ببینم، هەرزوو بتانگۆڕم. لەوەش واوەتر كاتێك لە كۆڕو كۆبوونەوەیەك، لەسەر جادە، بە نمونە لەسەر گۆڕی كاك نەوشیروان مستەفا دەتبینم، هوهات لێ‌ بكێشم. ئێ‌ تۆ كە لە بەرامبەر هەڤاڵێكی خۆت ئەوە ئەخلاقت بێ‌، دەبێ‌ هەر ئەوەش لەمن چاوەڕێ‌ بكەیت. ئەدی برادەرینە، ئەنگۆ نازانن، ئەوەی با بچێنێ‌، نەك هەر رەشەبا، بەڵكو زریان‌و تۆفان دەدورێتەوە..

لە ئیسكەندەنافیاوە


ڕەخنەی چاودێر

فڕین لە ڕێی سینەماوە

ڕاپرسی

پێت وایە لایەنەكان دەگەنە رێككەوتن بۆ چارەسەركردنی كێشەكانی باشوری كوردستان؟

دەنگ بدە