قەیرانی كەنداو و ئاشكرابوونی كەیسەكانی تیرۆر

6 رۆژ پێش ئێستا

وەرگێڕانی لەعەرەبییەوە: بابان حەمە
سەرچاوە: سایتی ئیلافی ئیماراتی


سایتی (ئیلاف)ی ئیماراتی لە سەرچاوەیەكی هەواڵگریی بریتانییەوە باس لەوە دەكات كە سیاسییەكی عیراقی حزبی بەعسی هەڵوەشاوە، خەریكی كاروباری رێكخستنی گروپەكەیەتی‌و دامەزرێنەری حزبی ئیسلامی سوننەیەو پشتیوانییەكی بەهێزی گروپە چەكدارییە توندڕەوەو تێرۆریستییەكان دەكات‌و سەرقاڵی دامەزراندنی لقی عیراقی ئیخوان موسلمینە.
ئەو پیاوە یەكێكە لەسەرمایەدارو دەوڵەمەندەكانی عیراق‌و پێشتریش عودەی كوڕی سەدام حسێن-ی سەرۆكی لەداردراوی عیراقی بەر لە پرۆسە، نزیكەی 700 ملیۆن دۆلاری خستۆتە بەردەست بۆ رێكخستن‌و توندوتۆڵكردنەوەی سوپای هەڵوەشاوەی عیراقی پێشوو و دامەزراندنی سوپایەكی چەكداری میلیشیا كە راستەوخۆ عودەی خۆی سەرپەرشتی بكات‌و بیان جوڵێنێت.
 
بەیعەت بە بەغدادی
پاش  كوژرانی عودەی‌و دەستگیركردنی سەدام حسێن، (خ.خ) كە كورتكراوەی ناوی ئەو كەسەیەو سەرچاوە بریتانییەكە ناوەكەی نەنوسیوە، عیراق بەرەو ئەردەن بەجێدەهێڵێت‌و هەر لەوێ یەكێك لەبانكە گەورەكانی ئەو وڵاتە دەكڕێت‌و پاشان لقێكیشی لە قەتەر دەكاتەوە.
ساڵی 2012 بەشێوەیەكی زۆر كت‌وپڕ دەبێتە خاوەنی رەگەزنامەی قەتەری ‌و ئیدی پاش ئەوەش لەهاتووچۆی بەردەوامی نێوان وڵاتانی توركیا‌و قەتەر و ئیمارات و ئەردەن ‌و رۆمانیاو ئیمارات.
پاش ئەمەش، بەیعەت بە خەلیفەی داعش ئەبوبەكر بەغدادی دەدات‌و لە پەیجی تایبەتی خۆی لە تۆڕی كۆمەڵایەتی فەیس بووك دەنووسێت (ئەو ئەمیری منە). بەڵام زۆری پێناچێت لەو بەیعەتە پەشیمان دەبێتەوە.
لەچەندین چاوپێكەوتنی تەلەفزیۆنیدا، بەتایبەت پاش ئەوەی داعش توانی كۆنتڕۆڵی موسڵ بكات، (خ.خ) ئاماژەی بۆ ئەوە كردووە كە سەركەوتنی دەوڵەتی ئیسلامی ‌و خەلیفە ئەبوبەكری بەغدادی لە موسڵ ‌و ناوچەكانی دیكەی عیراق، سەركەوتنی شۆڕشگێڕە عیراقییەكانە بەسەر میلیشیاتی شعیەكان.

لە داعشەوە بۆ ئیخوان
ئەم پیاوە (كە سایتی ئیلافی ئیماراتی لەزاری سەرچاوە بریتانییەكەوە، ناوەكەی تەنها بە پیت نوسیوە)، بەیەكێك لە ئیخوانییەكان دادەنرێت كە ئیدارەی كاروباری ئیخوانییەكان دەكات لە عیراق، پاش ئەوەش پەیوەدنییەكی توندو تۆڵیشی لەگەڵ یوسف قەرزاوی-دا هەیە، كە لەقەتەر دادەنیشێت. وەك چۆن ئیخوانییەكانی میسر كەوتن، بەهەمان شێوەش خەونی دامەزراندنی ئیخوانییەكانی خ.خ لەعیراق هەرەسی هێنا، كە پێشتر هەوڵی بۆ ئەو دامەزراندنە دەدا‌و ئەوكاتەش قەتەرییەكان‌و توركیاو ئیخوانییەكانی میسر بەتەواوەتی پشتیوانییان لە دامەزراندنی لقی ئیخوان موسلمینیان لە عیراق دەكرد.

كەشف بوونی دەستەكەی!
  پاش ئاشكرابوونی دەستەكەی! و تۆمەتباركردنی بە گەندەڵی‌و بەرتیل بەخشین‌و تەخشان‌و پەخشان كردنی پارەكانی بۆ پشتیوانی و پاڵپشتیكردنی ئیخوان موسلمین، ئەردەن قەدەغەی كرد كەبێتە وڵاتەكەیەوەو نەك ئەمەش، بەڵكو فەرمانی دەست بەسەركردنی بۆ دەركرد، دوابەدوای ئەمەش حكومەتی عیراقی هەمان بڕیاری ئەردەنی دەركردەوە.
لە ئیماراتیش، كاتێك بەلێشاو پارەی پرۆژە خێرخوازییەكانی وەردەگرت‌و دەهاتە بەردەست، زۆربەی هەرەزۆری ئەو پشتیوانی و داهاتە خێرخوازییەی دەنارد بۆ ئەو رێكخستن‌و بزوتنەوە ئیخوانییەكانی عیراق، ئاشكرابوونی ئەمەش وایكرد كە لە ئیمارات مرۆڤێكی ناچیزو ناجۆر بێت.

هاوسەرگیری لەگەڵ كچەكەی سەدام
پاش ئەوەی لەگەڵ سەركردەیەكی سیاسی لەعیراقدا دەبێتە ناكۆكیان، ئەو سەركردەیە باس لەوە دەكات كە خ.خ لەگەڵ  رەغد-ی كچی سەدام حسێندا هاوسەرگیری كردووە، پێشتریش خۆی باسی لەوە كردبوو كە هاوسەرگیری لەگەڵ رەغد-دا كردووە، بەڵام سەرچاوەكان بەشێوەیەك باسیان لە هاوسەرگیری (خ.خ) و رەغد كرد، كە تەنها بۆ سەرنج و سۆزڕاكێشانی سوننەكانی عیراق، بەتایبەتی ئەوانەی كە هاوسۆزی سەدام و حزبی بەعس بوون، بەكاری هێناوە.

ناردنی تێرۆیستان بۆ عیراق‌و سوریا
خ.خ ، خاوەنی كەناڵێكی ئاسمانی عیراقییە، تائێستاش بە دروستی‌و ووردی نازانرێت سەروەت‌و پڕۆژەو سامانەكانی لەناوخۆ و دەرەوەی عیراقدا چەندن ‌و چیین؟
بەپێی زانیارییەكانی سایتی ئیلاف-ی ئیماراتی (كە دەڵێت چەندین زانیاری ووردمان لەسەر ئەو بابەتە هەیە)، باس لەوە دەكات كە خ.خ و كوڕەكەی س.خ چەند كۆمەڵەیەكیان لە توركیا پێكهێناوە بۆ گواستنەوەی شەڕكەرە بیانییەكان لە توركیاوە بۆ عیراق‌و سوریا، پاشان رەوانە كردنی ئەو پارەو سامانە زۆرو زەوەندانە لەتوركیاوە بۆ ئەو كۆمەڵەیو دامەزراوانەی كە خ.خ و كوڕەكەی س.خ خاوەنداریی دەكەن.

باخەكەی لە رۆمانیا!
سایتی ئیلاف لەزاری سەرچاوە بریتانییەكەوە ئاماژە بۆ ئەوە دەكات كە خۆی و كوڕەكەی باخێكیان لە وڵاتی رۆمانیادا هەیە، كە رووبەرەكەی هێندەی وڵاتی لوبنان دەبێت، باخەكەش ناوی (باخی عەرەبییە)، كە پێشتر ئەو باخە، خاوەندارییەكەی حزبی بەعسی عەرەبی ئیشتراكی بوو، بەڵام بەهۆی ئەو پەیوەندییە توندو تۆڵەی كە هەیبوو لەگەڵ هەردوو كوڕەكەی سەدام (عودەی و قوسەی)، پاش روخانی سەدام حسێن‌و كوژرانی هەردوو كوڕەكەی‌و پێشتریش وەك ئاماژە بە هاوسەرگیری خ.خ و رەغد-ی كچی سەدام كرا، ئەم باخە بوو بە موڵكی خ.خ.

زۆرترین خوێندراو

ڕاپرسی

پێت وایە لایەنەكان دەگەنە رێككەوتن بۆ چارەسەركردنی كێشەكانی باشوری كوردستان؟

دەنگ بدە