ڕاگه‌یاندراوی كۆبوونه‌وه‌ی ئه‌نجوومه‌نی سه‌ركردایه‌تی یه‌كێتیی

6 رۆژ پێش ئێستا

یه‌كێتیی نیشتمانیی كوردستان دوای كۆبوونه‌وه‌یه‌كی چه‌ند سه‌عاتی ئه‌نجومه‌نی سه‌ركردایه‌تی له‌ هه‌ولێر، راگه‌یه‌نراوێكی بڵاوكرده‌وه‌و تێیدا جه‌خت له‌سه‌ر ستراتیجی كوردایه‌تی و كۆڵنه‌دانی دیموكراسی یه‌كێتی ده‌كاته‌وه‌و رایده‌گه‌یه‌نێت: نه‌ پله‌و پایه‌ی به‌غدا له‌ خشته‌ی بردین و نه‌ كێشه‌كانی كوردستانیش، هه‌ڵیدێراوین، هه‌روه‌ها دووپاتیده‌كاته‌وه‌ به‌م رۆحیه‌ته‌وه‌ مامی گه‌وره‌مان له‌ سیاسه‌تدا گه‌وره‌ی كردین و ئێستاش مه‌زارگاكه‌ی قه‌ڵای وره‌و په‌یمانی هه‌تاسه‌رمانه‌.

ئه‌مه‌ش ده‌قی راگه‌یه‌نراوه‌كه‌یه‌: 
ڕاگه‌یاندراوی كۆبوونه‌وه‌ی ئه‌نجوومه‌نی سه‌ركردایه‌تی (ی. ن. ك)

جه‌ماوه‌ری ئازادیخوازی كوردستان

له‌ هه‌لومه‌رجێكدا، ناوچه‌كه‌ له‌دۆخی پێكدادانێكی تری دوای سه‌ركه‌وتنی شه‌ڕی به‌ره‌ییه‌ به‌سه‌ر داعشدا، هاوكات له‌ یه‌كه‌مین رۆژی هه‌ڵمه‌تی هه‌ڵبژاردن، ئه‌نجوومه‌نی سه‌ركردایه‌تی یه‌كێتی نیشتمانی كوردستان، به‌سه‌رپه‌رشتی جێگری سكرتێری گشتی هه‌ڤاڵ كۆسره‌ت ره‌سول عه‌لی به‌ئاماده‌بوونی جێگری سه‌رۆكی حكومه‌تی هه‌رێم و به‌رپرسی زانیاری و جێگری سكرتێری ئه‌نجوومه‌نی ناوه‌ند، كۆبوونه‌وه‌ی بۆ هه‌ڵسه‌نگاندن و په‌سندی بڕیارو به‌رنامه‌كانی هه‌ڵبژاردن سازكرد.
له‌ كۆبوونه‌وه‌كه‌دا، راپۆرتی ده‌زگای هه‌ڵبژاردن و هه‌ڵمه‌تی راگه‌یاندنی هه‌ڵبژاردن له‌لایه‌ن به‌رپرسی مه‌كته‌ب ڕاگه‌یه‌ندرا. گفتوگۆیه‌كی هه‌ڤاڵانه‌یان له‌سه‌ركرا، دوای بۆچوونه‌كان و ره‌خنه‌كان، لیژنه‌ی باڵای هه‌ڵبژاردن، ده‌زگای هه‌ڵبژاردن و مه‌كته‌بی راگه‌یاندن و لیستی بازنه‌كانی هه‌ڵبژاردن ڕاسپێردران، گه‌رم و گوڕ، بڕیارو به‌رنامه‌كان جێبه‌جێ بكه‌ن.
كۆبوونه‌وه‌ پێی وایه‌ سیاسه‌ت و به‌رنامه‌ی هه‌ڵبژاردن... بۆ ناو عێراق و له‌ناو عێراقیشدا، بۆمافه‌ زه‌وتكراوه‌كانی گه‌له‌ سته‌م دیده‌كه‌مانه‌ كه‌ (11) ساڵه‌، له‌ لایه‌ن حكومه‌ته‌كانی دوای روخاندنی سه‌دامه‌وه‌، ده‌ستی به‌ده‌ستی پێ ده‌كرێ، له‌جێبه‌جێنه‌كردنی ماده‌ی (140) و دوای (15) ساڵ له‌ روخاندنی ڕژێمی به‌عس، تازه‌ به‌تازه‌ بودجه‌ی كوردستان كه‌م ده‌كرێته‌وه‌ و هێشتا چه‌كداركردنی هێزی پێشمه‌رگه‌ یه‌ك له‌سه‌ر سه‌دی حه‌شدی شه‌عبی تازه‌ دامه‌زرێنراو نییه‌. ته‌نانه‌ت مووچه‌ی فه‌رمانبه‌رانیش بڕ بڕ ده‌درێت. ئه‌مه‌ جگه‌ له‌وه‌ی دۆخی كه‌ركوك، شنگال، سه‌عدیه‌، مه‌نده‌لی، دووزخورماتوو، جه‌له‌ولاو خانه‌قین، دۆخێكی نه‌خوازراوه‌ و هاوڵاتیانی ئه‌و شارانه‌ نیگه‌رانن و هه‌وڵێكی تایفه‌گه‌ریش ده‌درێ، ناكۆكییه‌كانی كوردو توركمان و عه‌ره‌ب، ناكۆكییه‌كانی نێوان ئێزیدی و شیعه‌ و سوننه‌ قووڵتر و په‌راوێز خستنی ئاینزاكانی تر، زیاتر بكرێ.
سه‌ره‌ڕای ئه‌و دۆخه‌ ناله‌باره‌و قه‌یرانه‌ ئابووری و گوزه‌رانه‌ سه‌خته‌ی خه‌ڵك، یه‌كێتی پێی وایه‌ كێشه‌ی كورد، هێنده‌ ڕه‌وایه‌ و مافه‌كانیشی به‌شێوه‌یه‌ك پێشێڵ كراوه‌، هیچ كوردێكی به‌ویژدان نییه‌، ئێستاش له‌ باشووری كوردستاندا داكۆكی له‌ مافه‌ دیموكراسی و پیشه‌یی و یاساییه‌كان نه‌كات. هه‌روه‌كو هه‌موو كوردێكی ئازادیخواز، له‌به‌شه‌كانی تری كوردستانیشدا سه‌ره‌ڕای تێكچوونی دۆخی ناوچه‌كه‌، سووره‌ له‌سه‌ر مافه‌ ڕه‌واو دیموكراسییه‌كان.

جه‌ماوه‌ری كۆڵنه‌ده‌ر
یه‌كێتی باش ده‌زانێ قه‌یران و پاشه‌كه‌وتی مووچه‌، فشارێكی زۆری خستۆته‌سه‌ر مووچه‌خۆر. گه‌رچی دوا ده‌ستكاری پاشه‌كه‌وتی مووچه‌ له‌لایه‌ن حكومه‌تی هه‌رێمه‌وه‌ مایه‌ی ده‌ستخۆشیه‌، به‌ڵام چاره‌سه‌ركردنی ته‌واوی كێشه‌ی پاشه‌كه‌وتی مووچه‌ ئه‌ركمانه‌ و له‌پێناویدا درێخی ناكه‌ین. دڵنیاشین، به‌ره‌ به‌ره‌ قه‌یرانی ئابووری كوردستان، كه‌ هاوكاتی قه‌یرانی ئابووری جیهان و ناوچه‌كه‌ و داشكانی به‌های نه‌وت سه‌ری هه‌ڵدا، دڵنیاین ئاسۆی چاره‌سه‌ریان ده‌ركه‌وتووه‌.
یه‌كێتی، هێزێكی تاقی كراوی مه‌یدانه‌كانی خه‌باته‌ له‌ شاخ و شارو له‌ حكومه‌ت و خه‌باتی مه‌ده‌نیشدا. ئێمه‌ هێزێك نین له‌شاخ و شاردا، هه‌ڵپه‌رست بووبین، به‌ڵكو به‌رپرسیاریه‌تی سه‌رشانمان، زۆرتر له‌ دۆخه‌ سه‌خته‌كاندا ڕاده‌په‌رێنین، بۆیه‌ له‌كاره‌ساته‌كانی شۆڕشدا، چۆكمان دانه‌دا، له‌ پیلانه‌كانی ناوخۆو ئه‌ركه‌كانی حوكمڕانی و قه‌یرانه‌كانیشدا، خۆمان له‌تێكۆشان و ره‌خنه‌ و هه‌ڵوێست نه‌دزیه‌وه‌. 
نه‌ پله‌ و پایه‌ی به‌غداد له‌ خشته‌ی بردین و نه‌ كێشه‌كانی كوردستانیش، هه‌ڵیدێراوین. له‌و ئه‌زموونانه‌و به‌م رۆحیه‌ته‌وه‌ مامی گه‌وره‌مان له‌ سیاسه‌تدا گه‌وره‌ی كردین و ئێستاش مه‌زارگاكه‌ی قه‌ڵای وره‌ و په‌یمانی هه‌تاسه‌رمانه‌.

گه‌لی كوردستانمان
سه‌ركردایه‌تی یه‌كێتی جارێكی تر له‌م هه‌ڵبژاردنه‌دا، له‌كاتێكدا ره‌خنه‌ له‌ناو هه‌ڵه‌كانمان له‌ حكومه‌ت و له‌ كێشمه‌ كێشه‌كانی ناو یه‌كێتی ده‌گرین، به‌ڵام دڵنیاین یه‌كێتیه‌ په‌رۆشه‌كان به‌شانازیه‌وه‌ ده‌ست به‌ئاڵای سه‌وزی یه‌كێتیه‌وه‌ ده‌گرن، چونكه‌ ده‌زانن:
یه‌كه‌م:  یه‌كێتی ده‌ست به‌رداری ستراتیژی دیموكراسی و كوردایه‌تی نه‌بووه‌ و ناشبێ. 
دووه‌م: كێشه‌كان هه‌ڵیان نه‌دێراین بۆ شه‌ڕی ناوخۆ و دروستكردنی دوو ئیداره‌ له‌ كوردستاندا.
سێیه‌م : راپه‌ڕاندنی ئه‌ركه‌ هاوبه‌شه‌كانی هێزی پێشمه‌رگه‌ و ئاسایشمان، پاراست. 
چواره‌م: سه‌ربه‌خۆیی سیاسی یه‌كێتیمان نه‌دۆڕاند و سه‌نگی دیبلۆماسیه‌تی یه‌كێتیشمان له‌ ناوچه‌كه‌دا له‌ده‌ست نه‌دا. 
پێنجه‌م: سه‌ره‌ڕای قه‌یرانی ئابووری و دژایه‌تی تاڕاده‌ی دوژمنكارانه‌مان، بواری خه‌باتی مه‌ده‌نیمان به‌رته‌سك نه‌كرد. 
شه‌شه‌م: كه‌ قه‌یران سه‌ری هه‌ڵدا، سوور بووین له‌سه‌ر مووچه‌ی پێشمه‌رگه‌، پۆلیس، ئاسایش، كه‌سوكاری شه‌هیدان و كه‌م ئه‌ندامانمان و مووچه‌خۆران تێكڕا.
حه‌وته‌م: به‌رگه‌ی قه‌یرانه‌كانمان گرت و ئاماده‌بووین فشار بخه‌ینه‌ سه‌ر ئۆرگان و ئه‌ندامه‌كانی یه‌كێتی، به‌ڵام رێگه‌مان نه‌دا كاری نابه‌جێ به‌رامبه‌ر بازاڕو سه‌رمایه‌دار بكرێت.
هه‌شته‌م: دوای ڕووداوه‌ چاوه‌ڕواننه‌كراوه‌كانی 16 ی ئۆكتۆبه‌ر، سه‌رباری پڕوپاگه‌نده‌ نابه‌جێكان، به‌رگه‌ی لێكه‌وته‌كانی ڕووداوه‌كانمان گرت، به‌ڵام ده‌ستبه‌رداری كه‌ركوك و ناوچه‌كانی ماده‌ی (140) نه‌بووین و نابین.
له‌ كۆتاییشدا. .یه‌كێتی ئامانجێتی، ئه‌نجامی هه‌ڵبژاردنی ئه‌مجاره‌ به‌شێكی برینه‌كان ساڕێژ بكات، نه‌ك گه‌رمی تای هه‌ڵبژاردن، ده‌سكه‌وته‌ مه‌ده‌نییه‌كانیشمان له‌ده‌ست بدات. له‌م روانگه‌وه‌، رێز له‌هه‌موو لیسته‌كان ده‌گرین، به‌ڵام مستیش له‌ ده‌روشه‌ ده‌گه‌ڕێته‌وه‌. 

جه‌ماوه‌ری خۆڕاگر ! 
یه‌كێتییه‌كه‌ی شۆڕشی نوێ، یه‌كێتییه‌كه‌ی مه‌دره‌سه‌ی فره‌یی حزبایه‌تی، یه‌كێتیه‌كه‌ی دیموكراسی و نان و ئازدی، یه‌كێتیه‌كه‌ی داستانه‌كانی شه‌ڕه‌كان و كه‌ژاوه‌ی شه‌هیدان و خۆڕاگری، یه‌كێتییه‌كه‌ی قاڵبوی ئه‌نفال و كیمیاباران، یه‌كێتیه‌ رێچشكێنه‌كه‌ی راپه‌رین و داهێنه‌ره‌كه‌ی فیدرالی و یه‌كێتیه‌كه‌ی تێكدانی پیلانه‌كانی ناوخۆیی و ئیقلیمی، یه‌كێتیه‌كه‌ی خاوه‌ن پڕۆژه‌ی گه‌شه‌كردنی زانكۆ و په‌یمانگاكان بۆ ته‌واوی شاره‌كان و ئاوه‌دانكردنه‌وه‌ی ناوچه‌كانی ئه‌نفاله‌كان، یه‌كێتیه‌كه‌ی ژیانه‌وه‌ی هه‌ڵه‌بجه‌ و قه‌ڵادزێ و پێنجوێن و سه‌ید سادق و چوارتاو (28) ناحیه‌ و (5000) هه‌زار گوندی خاپووركراو، یه‌كێتیه‌كه‌ی دابینكردنی مووچه‌ و ئه‌رز بۆ كه‌سوكاری شه‌هیدان و كه‌م ئه‌ندامانی سه‌نگه‌ر. هه‌ر یه‌كێتی نیشتمانی كوردستانه‌كه‌تان ده‌مێنێته‌وه‌.

ئه‌ی جه‌ماوه‌ری په‌رۆشی كوردستان...
 خۆتان ده‌زانن ئه‌وه‌ یه‌كێتی بوو یاسای ئه‌حواڵی شه‌خسی گۆڕی و ده‌سته‌به‌ری مافی كرێكاران و خاوه‌ن پرۆژه‌ی سۆسیاله‌ له‌ په‌رله‌ماندا، ئه‌و یه‌كێتییه‌ی هه‌مواركردنی یاسای سزادانی عێراقی بۆ قه‌ده‌غه‌كردنی كوشتنی ژنان به‌ناوی شه‌ڕه‌ف و راگرتنی مادده‌ی (409)، كرده‌ بڕیاری دیموكراسی كوردستانی
یه‌كێتییه‌كه‌ی دابه‌شكردنی ده‌سه‌ڵاته‌كانی سه‌رۆكایه‌تی هه‌رێم و لێبووردنی گشتی. هه‌روه‌ها بڕیاری هاوتاكردنی ژماره‌ (19) بۆ یه‌كخستنی هێزه‌كانی (70) و( 80 ) زیادكردنی مووچه‌كانیان و مووچه‌ی پێشمه‌رگه‌و ناوخۆ، هاوكات هه‌مواركردنی یاسای خوێندنی باڵا. ئه‌مه‌ جگه‌ له‌و یه‌كێتییه‌ی یاسای سندوقی داهاته‌كانی نه‌وت و گاز له‌ هه‌رێم.

به‌ڵێ گه‌لۆ!
یه‌كێتیه‌كه‌ی پشتوانی مافه‌كانی به‌شه‌كانی كوردستان و پاڵپشتی كۆبانێ و داواكاری  ئاشتی له‌باكوور، یه‌كێتییه‌كه‌ی چاره‌سه‌ركردنی ئاشتییانه‌ی كێشه‌ی كورد له‌ رۆژهه‌ڵاتی كوردستان، ئه‌م یه‌كێتیه‌ی مام جه‌لال و ئه‌و مێژووه‌ پڕ له‌ سه‌روه‌رییه‌یه‌، به‌ دڵنیاییه‌وه‌ رێگا نادات هیچ كه‌س و لایه‌ك موزایه‌ده‌مان به‌سه‌ره‌وه‌ بكات، خۆمان هه‌ڵه‌و كه‌موكوڕییه‌كان ده‌زانین و ره‌خنه‌یان لێ ده‌گرین و نیگه‌رانی رای گشتی ده‌ڕه‌وێنینه‌وه‌، خۆشمان له‌ به‌رپرسیاریه‌تی هه‌ڵه‌ی هه‌موو كابینه‌كان نادزینه‌وه‌، بۆیه‌ دڵنیاین، به‌شی زۆری ده‌نگده‌ری به‌ویژدان و ئازادیخواز به‌دروشمه‌ بریقه‌داره‌كان فریو ناخۆن، دڵنیاین ره‌نجده‌رانی بیر و بازوو كه‌ مام جه‌لال هه‌میشه‌ خه‌مخۆریان بوو، مامۆستایان، فه‌رمانبه‌ران، پارێزه‌ران، پزیشكان، كارمه‌ندانی ته‌ندروستی، پیشه‌كانی كشتوكاڵی، كه‌مئه‌ندامان، نابینایان، هونه‌رمه‌ند و نووسه‌ران، وه‌رزشكاران، كوردستانیانی تاراوگه‌، ژنان و لاوان، كه‌سوكاری ئه‌نفال و كیمیاباران، جه‌رگ سووتاوه‌كانی شه‌هیدان و پێشمه‌رگه‌ی سه‌نگه‌ر و كه‌مئه‌ندام، كاسبكاران و سه‌رمایه‌داران و تێكڕا چین و توێژه‌كان، دڵنیاین یه‌كێتی وه‌كو ئه‌مانه‌تی مام جه‌لال و شه‌هیده‌ سه‌ركرده‌كان و ده‌ربه‌ستی دیموكراسی و دادپه‌روه‌ری و گۆڕانكارییه‌كان ده‌زانن.
له‌م هه‌ڵبژاردنه‌ی عێراقیشدا، به‌ویژدانی زیندوویانه‌وه‌، له‌ هه‌ڵه‌و كه‌م و كوڕییه‌كانمان ده‌بوورن، رۆژی ده‌نگدان ده‌كه‌نه‌ فێستیڤاڵی په‌یمان نوێكردنه‌وه‌ بۆ مام جه‌لال و بۆ شه‌هیدان و بۆپێشمه‌رگه‌ و ده‌نگ به‌ لیستی (162)ده‌ده‌ن، كه‌ تاقه‌ لیستی سه‌وزی یه‌كێتییه‌ و هیچ لیستێكی تر له‌سایه‌ی لیستی (162)مان بوونی نییه‌.

ئیتر بۆ پێشه‌وه‌ به‌ره‌و  ده‌نگدان به‌لیستی (162)ی یه‌كێتی نیشتمانی كوردستان 

ئه‌نجومه‌نی سه‌ركردایه‌تی
یه‌كێتی نیشتمانی كوردستان
هه‌ولێر 15-4-2018

ڕاپرسی

پێت وایە بەغدادو هەرێم دەگەنە رێككەوتن‌و كێشە سیاسی‌و ئابورییەكان چارەسەر دەكەن؟

دەنگ بدە