یەكێتی‌و دەستاودەستكردنی دەسەڵات

10/01/2018

مەلا بەختیار
لەسەر رستەیەكی قسەكانمان لە (رووداو)دا، كاكە شاخەوان برایم عەبدوڵڵا، بەگشتی وتارێكی جوانی نوسیووە. شرۆڤەی چاوپێكەوتنەكەی كردووە، وەڵامی هەندێك لە رەخنەكانیشی داوەتەوە. بەڵام لەمەڕ دەستاودەستكردنی دەسەڵات‌و دەسەڵاتی یەكێتی، دیقەتی لە قسەكان نەداوە. ئەم كورتە نوسینەم بەپێویست زانی، هەتا بە هەڵە بۆچوونەكانی من‌و شاخەوان، بەسەر خوێنەری وشیاردا تێ نەپەڕن.
جەخت دەكەمەوە كە، یەكێتی، دەنگ زۆر بهێنێ یان كەم، هەر یەكێتییە. مەبەستمە بڵێم: خۆ ئەگەر رێژەمان دابەزی، یەكێتی هەڵناوەشێتەوە. یان ناوەكەشی ناگۆڕین. حزبی گەورە گەورە لە مێژوودا هەڵبژاردنی دۆڕاندووە، خۆی بۆ هەڵبژارنی تر سازداوە. پرۆسەی بردنەوەو دۆڕان لە جیهانی دیموكراسیدا بەردەوامە. هەتا پرۆسەی دیموكراسیش بمێنێ، دەستاودەست كرنی دەسەڵات بەردەوام دەبێ.
بۆ هێزی چەكداریش؛ ئەوەی هاوكێشەكانی كوردستان لەم قۆناغەی نەبونی دەستوری كوردستان‌و پڕۆژەی ستراتیژی یەكخستنی هێزەكانی پێشمەرگەو ئاسایش باش بخوێنێتەوە، بۆی دەردەكەوێ كە یەكێتی چۆن دەتوانێ هێزەكانی تەسلیم بە هێزی تر، یان وەزارەت بكات، كە جارێ دەستەبەری هێزی یەكگرتووی نیشتمانی لە روی یاساو دەستورەوە نەبێ؟
دۆخی گەلانی وەكو ئێمە رێك وایە، ئەزمونی شۆڕشە چەكدارەكانی جیهانیش وان، لە كوردستانیشدا:
هێشتا لە چارەكی یەكەمی سەدەی دامەزراندنی سیستەمی دیموكراسیداین. ئەویش لە چوارچێوەی فیدراڵدا، نەك كوردستانێكی سەربەخۆ.
ئێمە لە قۆناغی گوزەری دیموكراسیداین، ئەم قۆناغە كێشمەكێشی زۆرە، بە عەسكەریشەوە. هەتا دەگەینە سەقامگیری دیموكراسی.
لە هەمووی سەیرتر، ئەوانەی رەخنە لەو بۆچونەم دەگرن، لەسەر یەكێتی‌و هێزەكەی، زۆرتر، رەخنەیان لە پارتیە. دەشزانن پارتی لە ناوچەكانی خۆیان، ئەگەری سەركەوتنی زیاترە لە لایەنەكانی تر، كەچی دەشڵێن: یەكێتی با هێزەكەی تەسلیم بكات، واتا تەسلیم بە لەشكرێكی بكات، كە پارتی دەسەڵات‌و هەژمونگەری لەسەری هەیە. ئەمەیان چەندی بە چەن؟!
پرسیار هەیە، كە بۆچی لە دوای هەڵبژاردنی پێشوو، پۆستی پارێزگار نەدرایە گۆڕان، لە وەڵامدا دەڵێین، چونكە:
 گۆڕان پێش یەكێتی حكومەتی لەگەڵ پارتیدا پێكهێنا. دوو وەزارەتی گرنگی یەكێتیشیان وەرگرت. دوایش رێككەوتبون كە پارتی، پشتیوانی گۆڕان بكات بۆ وەرگرتنی پۆستی پارێزگار. یەكێتی، ئەمەی بە پیلانی هاوبەشی پارتی‌و گۆڕان لێك دەدایەوە. بۆیە، وترا:
گۆڕان بە دەنگی خۆی لە ئەنجومەنی پارێزگای سلێمانیدا، بتوانێ بیباتەوە، پیرۆزیان بێ. بەڵام بە پیلانی هاوبەشی پارتی‌و گۆڕان، یان هەر لایەكی تر، بیانەوێ دژی یەكێتی یەك بگرنەوە، بەبێ ئەوەی هاوپەیمانی سیاسی لە نێوانیاندا هەبێ، ئەمەیان یەكێتی قورسە قبوڵی بكات.
لە كۆتاییشدا.. پێویستە بڵێم: هەموو ئەو بۆچونانەم كوتومت، زادەی سیاسەتی یەكێتییە. بەڵام، بە دڵنیاییەوە، باوەڕی نەگۆڕم بە دەستاودەستكردنی دەسەڵات هەیە. رادەستكردنی دەسەڵاتیش دوای بردنەوەی هەر لایەك، بە بەشێكی پرۆسەی دیموكراسی دەزانم.
دوای ئەوەی رێژەی دەنگەكانیشمان لە دوا هەڵبژاردندا دابەزی، من‌و هەڤاڵێكی تری مەكتەبی سیاسی، سور بوین لە بەیاننامەیەكی كورتدا، ئەنجامەكە قبوڵ بكەین‌و پیرۆزبایی لە هەموو لایەك بكەین. ئەو كاتەش. هەر دەبێ بیر لە پرۆژەی ستراتیژی یەكخستنی هێزەكان، لەسەر بنەمای تەواوكردنی پرۆژەی دەستوری كوردستان، بكرێتەوە.

ڕاپرسی

پێت وایە بەغدادو هەرێم دەگەنە رێككەوتن‌و كێشە سیاسی‌و ئابورییەكان چارەسەر دەكەن؟

دەنگ بدە